已經進入每兩個星期檢查一次既階段
今次姑娘摸肚話我個肚大, 個size係34w, 但我依家先32w3d
不過佢話响2w之內就冇問題wo, 問佢過大會唔會有咩影響
佢又叫我唔洗擔心, 依家冇問題...
問佢關唔關食野事, 佢又話唔關...
總結, 唔洗理...
血壓, 血糖, 體重都好正常...
小B頭仔向下...
32w體重: 65.4kgs, 今次姑娘話重得好好啦~~
但其實我既飲食係冇變過~
除左片片之前因為coupon到期, 所以走去買左先之外
我同小B爸一直都未開始買小B既用品...
終於買左第一件小B用品啦...
CASABLANCA床上用品12件裝1set, 開倉價$399
再買多1set床單枕袋$90, 仲有一張精靈被$119
雖然只係得winnie the pool 款, 不過都好可愛啦, 仲係pink color~
第五堂工作坊教抱BB姿勢同技巧, 原來抱BB都有STEP 架,
當然唔係講就咁抱住個BB咁簡單啦...
係教我地點抱個BB先唔會咁攰同埋唔會扭親隻手, 因為好多媽媽
抱得BB耐會手痛架....
仲講下點先可以抱住個BB由一邊手轉去另一邊手,
我就一直覺得好危險, 對做依家個動作冇信心, 但學過之後,
又覺得唔係咁難喎, 希望第日抱住小B都冇問題啦...
最後仲教我地應該點將BB交去另一個人手上, 因為有D朋友黍探
BB時會想抱下, 但又唔知點抱, 只會準備好環抱既手勢等你放BB落去,
所以我地要知道應該點先可以正確咁放落第二個人手上.....
當然好多媽媽會覺得抱BB根本唔洗學, 都係既, 只要個BB到你手,
自然就會識, 但如果事前聽過應該點做, 到真係要抱時, 都會冇咁驚...
學完之後, 我有揾屋企既MONCHHICHI練習架, 嘻嘻~
今堂仲有講包被, 揹帶既用法同BB訓覺姿勢....
我仲未諗買邊隻揹帶好, 諗住等小B滿左月, 有需要先去買,
因為唔知佢條頸仔有幾多力呀.....
至於訓覺, 姑娘話一定要將BB對腳放到床最底, 咁就算BB訓著左,
點撐都只會向上, 唔會向下俾D被冚住個頭, 咁就安全得多...
姑娘仲叫我地由BB兩個月大開始同佢玩'PIKA-BOO'...
由開始自己向住BB拎住紗巾遮住塊面行埋BB到BOO, 到玩左幾次
BB有反應就可以將紗巾放上BB塊面短時間內拎開同BB BOO,
玩得一段時間, 就可以隔耐D先拎開紗巾, 玩下玩下, 當你放紗巾响
BB面上, BB就會識得自己用手拎開紗巾....咁就訓練到BB日後自救,
當有被冚住佢時, 佢就會以為有人同佢玩PIKA-BOO, 然後自己拎開張被....
依個方法都幾有趣架, 第日要記住同BB玩多D先得....哈哈~~~
唔經唔覺, 5堂既工作坊已經上完啦, 仲記得報名時覺得距離開課仲有
好長時間, 好期待快D開課, 但話咁快就完, 即代表見到小B既時間越來越
近啦....
總結, 我同小B爸都好滿意BB CARE工作坊依個課程, 姑娘講解得好清楚,
即使課堂完結時間係7點, 佢冇一堂係準時落堂, 又唔會趕住要落堂,
每一堂開課前都會好長氣咁重覆上一堂既重點, 做DEMO時, 佢又會
逐一行埋去睇下每對爸媽做得正唔正確, 一D都唔馬虎架, 佢真係好
有心咁想每一位準爸媽第日可以照顧好自己既BB.....所以依個課程
對我同小B爸都好有用.....
因為好耐冇見過小B响我肚肚入面既情況, 又好想知道佢
31w既重量同大細比例正唔正常, 所以book左Dr.Wong做check-up
已經好清楚咁睇到小B既頭仔, 手仔, 腳仔啦, 連眼耳口鼻都好清楚,
不過佢一直都側左少少面, 所以影唔到佢既正面,
Dr.想影佢既時候, 佢仲用隻手仔遮住, 真係好洩豬呀...
頭圍, 腳骨都已經响31w至32w範圍, 重量係1.9kgs
Dr.都係果句-長得好好~
不過我既血糖就高左少少啦, 唔知係唔係check之前飲左杯
朱古力奶呢, 因為我星期一响健康院check過都冇問題既~
好彩之後抽血再驗一次, 報告冇問題, 放心哂,
不過都係要減少一下甜野先得, 加上依家開始食腐竹旦,
白蓮so同芝麻糊, 其他甜野, 要再食少d lu.......加油!加油!
小B, 媽媽同爸爸見到你响媽媽肚肚入面一直都有長大, 真係好放心,
加埋你成日响我肚肚入面玩YOGA, 雖然搞到媽媽好唔舒服,
但好鐘意種感覺....你要乖乖地留响媽媽個肚肚入面多兩個月,
先出黍做YOGA俾媽媽同爸爸睇啦~
第四堂工作坊講幫BB沖涼
沖涼既程序由除衫到著衫都要Step by Step, 真係一d都唔易
先要洗頭, 如果有頭泥, 洗前先用按摩油搓頭髮, 等10分鐘, 再用濕紙巾抺乾淨
再洗頭, 洗過頭既水唔可以再用黍沖身....
除衫沖涼, 先平放洗前身, 肚腩仔, 要留意摺位
然後要反轉BB, 洗背面同patpat, 之後反返轉起身....
最難就係將BB反來反去啦, 驚個百厭B爭扎, 驚捉佢唔住, 睇DEMO好似唔難,
用BB公仔示範, 個公仔咁聽話, 冇難度, 但到時同BB沖真係唔知會係點....
沖完之後就要幫BB著衫, 洗臍帶, 著片片
洗臍帶都好講學問, 姑娘教用熟水好過用火酒
先用整濕大頭綿花棒,輕輕打開BB肚臍抹肚臍內邊, 每一下用一支新棒,
大約抹2-3圈, 最後先用火酒抹一圈, 避免臍帶發炎, 要保持肚臍乾爽...
最後整好d衫就用綿花球抹臉仔, 兩邊眼既上下, 額頭, 兩邊臉珠仔,
然後人中至下巴, 最後兩邊耳仔, 所以洗塊臉仔.要用10個綿花球....
總結, 幫BB沖涼聽落好似好易, 但始終都有擔心, 不過我有信心做得到,
仲好期待.........哈哈~
