有出世紙啦

小B拎左出世紙啦

中文名係小B爸同小B姑婆一齊改
雖然好難讀, 預左會俾人讀錯
但有温暖, 陽光既意思, 好特別
希望小B都會鐘意啦

英文名Melissa
但冇show响出世紙
因為驚小B唔鐘意, 大個左可以自己改過

可能個名太長啦
依家出現好多唔同既名俾人叫
LISA, SASA, 麥提莎等等
而我就鐘意叫小ME...

健康院打針+復活節去街街

一個月大既小B要去健康院做檢査同打針啦

體重4.5kgs, 差不多10lbs啦
姑娘話增長理想
黃疸指數係0, 冇黃啦

今次打乙型肝炎第二針
打响大脾仔
小B爸捉實小B腳仔
小B訓住覺咁俾姑娘吉左一針
但都只係'嘩' 左一聲
之後再訓
真係笑C人呀
姑娘話佢乖, 我就話佢係奀皮豬

小B既第一個復活節
約左契麻麻同爺爺去沙田high tea
再去同snoopy影相
但小B掛住覺覺豬

一直到奶奶時間就精神
第一次野餐, 仲係契爺爺餵
不過契爺爺話好似做左30分鐘運動咁
唔會再有下次

張小B, 媽媽都叫你食快D啦, 嚇到冇人餵你, 爸爸媽媽就慘啦

一個月

小B已經滿月啦

會聽人講野
會望電視, 望光
最曳係會扭眼訓, 要人抱

日頭訓得好好, 但一到夜晚就唔訓
抱住訓著, 放低又扭
奶咀跌左又扭, 要成晚幫佢執

奶奶越食越慢, 又越食越少
食到一半就含住唔啜
一餐成個鐘都食唔到90ml
但隔3個半鐘左右又要扭食

面仔仲未好返 面珠仔又紅又乾
日日用金銀花沖涼 再揸cream
小B又成日用手去捽, 可能唔舒服
睇到就心痛, 希望快d好返啦

張小B, 你真係好曳曳呀, 要打打打~

濕疹?胎毒?

上星期小B塊面仔出左好多粒粒, 之後仲要成面紅卜卜
有經驗既媽媽話係胎毒, 多數BB都會出,
用金銀花煲水沖涼, 過幾日就會退

沖左幾日, 仲用黍full mask, 但都未退
後來朋友話係濕疹
介紹左隻葯膏俾我買黍揸面
揸左兩日, 粒粒開始結焦, 而且冇咁紅

希望快d好返, 做返白白豬啦~~

Owen表哥探Melissa 表妹~~

嘔奶

唔知點解小B成日食奶時, 食到一半就郁身郁勢
佢又唔係唔肯食, 但就好似食到好唔舒服
有時係放屁屁, 有時係疴poopoo

近日小B有幾餐奶食食下都嘔返出黍
真係嚇c我, 因為唔知佢做咩會咁

上網睇到原來BB嘔奶係好正常, 咁先冇咁擔心
不過以後餵奶最好就慢d, 辛苦d都要分幾次俾佢食

嬰兒嘔奶其實是一種很常見的現象。
有研究發現0-3個月的嬰兒大約有一半每日至少嘔一次奶。
隨著年紀增長，食道與胃之間的括約肌日漸成熟，嘔奶的情況就會好轉。
大部分過了一歲以後便不再嘔奶了。
一般來說，要減少嘔奶發生機會，
這些孩子餵奶時需要為他們多做幾次”掃風”的動作，
而且最好不要在吃完奶半小時之內把孩放回床上平躺。

每次小B揾食個樣都笑C我
咀仔嘟到好似雀仔, 條脷仔係咁伸
個頭仔左右係咁擰
好搞笑架!!!

奶咀

小B响我肚肚入面, 我同小B爸一直都話唔好俾奶咀小B啜
驚佢第時好難戒..
但當佢食飽奶, 換左片, 但成晚都仲扭計
俾個奶咀佢就可以安靜哂, 全屋有覺好訓
你就覺得奶咀係偉大發明

朋友問我點解咁細個就俾奶咀佢
如果遲早都要俾, 咁不如早D俾啦
有左奶咀, 佢可以自己响床仔慢慢入睡
總好過要抱住先訓

我觀察到小B個咀仔成日都想揾野啜
就算食飽左, 個咀仔都冇時停
或者咀仔有野啜下先俾到佢安全感

扭計BI

小B越大越會扭計

食飽, 換好片, 想訓既時候就開始扭計
要人抱佢, 要人理佢
唔再可以自己响床仔訓覺, 好洩洩
小B媽唔想下下都要抱住先訓
所以唔到最後都唔會理佢







最後小B堅喊到失聲, 小B媽都係要抱起佢

是次回合, 小B勝....

父愛

小B公公睇到小B媽上一篇BLOG只係感謝小B婆婆就唔抵得
所以小B媽要補一篇感謝小B公公, 同時要好好感謝小B爸

事實上由我入院, 入產房, 到入手術室, 住院5日, 直到現在18日
小B爸都冇好好休息, 我响手術室果個半鐘, 小B爸响出面果種擔心
相信係前所未有
到我同小B住醫院果5日, 小B爸日日出入醫院兩次
又要上病房探我, 又要去兒科睇小B
夜晚又冇辦法熟睡, 我見到佢咁辛苦, 真係好心痛

出院之後緊加冇覺好訓, 冇啖好食
又要照顧做完手術坐月咩都唔做得既小B媽
又要照顧人仔細細成日唔知想點既小B
已經再冇辦法响小B爸身上揾到一舊仔肥肉
小B媽見到, 緊加心痛...

小B公公當年照顧十幾日人仔既小B媽, 相信一樣咁辛苦
爸爸對子女果種疼錫, 擔心, 一定唔會比媽媽少

父愛同樣偉大

感謝我的爸爸多年既照顧, 爸爸, 我愛你!!!

感謝小B爸對小B媽同小B既疼愛!!

WE LOVE YOU FOREVER !!!

深深感受到....

做左17日媽媽終於感受到媽媽對子女既擔憂..

好多謝我媽對我既付出!!!

 

張小B, 雖然你唔會記得爸爸媽媽點辛苦咁養大你, 但希望你有一日

會感受到我地有幾咁疼錫你, 即使你有幾扭計, 幾咁難湊, 你都係

爸爸媽媽既小寶貝.....