小me飲宴表現

今個月去左幾個飲宴
小Me都有份去
咁多陌生人既地方對bb黍講真係好大考驗
而小Me既表現就係睇當日心情

第一次去飲滿月
人唔算多, 只係6圍
我地開席前先到
小Me嫲嫲抱住進場
一去到就見到小Me舅公
小Me望左冇1分鐘就爆喊
一直喊到我抱返佢先收聲
之後俾bb椅佢坐
成晚keep住玩下又扭下
只要有男人埋身就爆喊要我抱
到最後得到眾人既一句'依個bb做咩咁扭計'
聽到依句, 小Me媽個心好唔安樂
真係覺得好羞, 好失禮

第二次係親戚結婚
不過小Me媽同小Me爸都冇去
只係公公同婆婆帶小Me去
小Me媽一直都擔心小Me見唔到MaMa會好扭計
點知婆婆話個個都讚小Me好乖
成晚自己坐bb椅玩
只係差唔多食奶時間先扭
食完奶仲訓埋覺
原來見唔到mama都冇問題

第三次係小Me契爺(小Me爸中學同學)結婚
小Me爸一早就出門口去做兄弟
到下午先返來接我地
剛好當日係小Me 9個月大
成朝都好好心情咁'dadada'唱歌仔
去到會場先飲奶奶
之後就睇行禮
小Me仲跟住大家一齊拍手(不過係人地拍完佢先拍)
小Me爸又帶佢出去接花球(當然係接唔到啦)
好心情一直維持到入席時訓左30分鐘
司儀開咪講野就醒左
之後坐返bb椅定定咁自己玩
又同同枱既人玩
仲要人人都肯跟
玩到散席都冇扭計
真係唔讚唔得...抵錫~

總結, 小Me出席大場合可以話ok, 又可以話唔ok
因為要睇佢當日心情
希望小Me日日都keep住好心情
咁就去邊都開開心心, 人人都讚啦~

(講真, 有人讚自己個女真係好開心架!)

小Me媽一手扶住小Me, 一手拎住電話影相, 仲可以取到景, 勁!

依個造型加個表情, 小Me媽好鐘意, LIKE!

等接花球中...

好鐘意依張相, 好有婚紗相feel~

睇下好心情既小Me有幾多古怪表情~