住院了

小Me因為發高燒懷疑係尿道炎
所以急症要佢住院做檢查同觀察

娜打素兒童病房(發燒)
一房有5張床
可以俾一位家長全日24小時留低陪小朋友
每個床位邊有一張單人梳化椅
家長可以响每晚10點至第二朝6點半開出黍訓

第一晚小Me好攰
食左兩啖粥
未夠10點已經訓左
婆婆見小Me訓左就走
而小Me媽冇飯食
唯有食左小Me d粥同帶去既面包

當晚小Me媽完全冇訓
一來冷氣太大
訓低就覺得好凍
怕自己都病埋
所以寧願唔訓
不停飲熱水
又行下暖下身

二來小Me訓到2點幾就爆喊
又抱又暗都係發哂脾氣
最後喊左個幾鐘先訓返
連隔離床個姐姐都嘈醒埋
起身望下小Me又嘆左口氣

之後小Me都係訓下醒下
可能生保床, 而且又有姑娘成日行出行入
所以訓得唔冧

第二朝起身奶又唔食
粥又唔食, 連水都唔肯飲
只係食左少少面包
之後姑娘帶左佢去抽鼻液
小Me媽响門口聽到佢大喊
真係眼淚水都出

醫生巡房都冇咩講
要等報告
之後姑婆黍接班
小Me媽返屋企沖個涼食個飯再眠一眠
雖然係擔心, 但點都要顧好自己
唔可以俾自己病埋

下午再返去
小Me岩岩訓醒扭計要揾'媽媽'
見到佢喊住要我抱抱個樣, 個心酸一酸
不過好快就收聲冇事
醫生再巡房話尿液冇問題, 唔係尿道炎
肺都好清, 唔係肺炎
耳仔冇問題, 唔係中耳炎
鼻液都冇問題, 唔係流感
咁好大可能係出玫瑰疹

第二晚燒已退
身上出現若隱若現既紅點
小Me9點就訓左
明顯訓得好過第一晚
半夜都會醒
但冇爆喊
唔洗抱起
拍下就訓返
3點幾醒左話要奶奶
可能全日冇咩食過野
所以肚仔餓
開左杯奶
飲完又再訓過
而小Me媽經過第一晚經驗
帶左張被, 著返條長褲
都訓左幾粒鐘

第三日朝早又有微燒
仍然唔肯食野, 唔肯飲水
咀唇乾到爆
醫生巡房睇過身上既紅點
疑似係疹, 但唔可以肯定
因為仍然有燒, 疹又唔明顯
出疹時間唔吻合
而且腳仔出現好似風難咁既物體
所以要再睇埋下午發燒情況先決定可唔可以出院

姑婆接班
小Me媽可以返屋企休息下

下午醫生巡房
紅點比之前明顯
風難物體已經消失
醫生話可以返屋企渡假
第二朝再返去做檢查

太好啦!
小Me爸當晚回家可以見到小Me
不過小Me仍然好攰
飯都冇食就訓覺
可能响醫院訓得唔好
開左杯奶佢飲
一覺訓到大天光

第二朝返到醫院
已經退哂燒啦
身上紅點都退左
醫生批准出院啦不過醫生話唔可以確診為玫瑰疹
因為同一般病例唔同......

點都好, 最緊要可以出左院
因為冇得落地, 冇野玩既小Me
心情已經差爆
脾氣越來越大
小Me媽忍耐力去到頂點....