十二朝

小B已經出世12日, 個樣日日變

返左屋企8日, 我同小B爸晚晚都冇覺好訓
頭幾日未掌握到佢食奶時間, 試過訓6個鐘都唔起身食奶
又試過每2hr就扭, 但食左30ml就訓到冇哂反應
食奶份量又唔係次次一樣, 60-90ml不等

依家佢會訓3.5至4hr就醒, 可以食到70-90ml, 不過要預一個鐘先食完
頭果60ml用5-10mins食完, 但之後開始慢慢嘆
尾段仲要訓住食, 得閒先同你啜兩啖, 最後仲訓埋, 采你都傻
半夜真係餵到訓著覺呀...

12日人仔既小B開始會扭計揾人抱
但我同小B爸都唔會理佢架, 除非去到失聲地步

一直我都想可以做全人奶媽媽, 但可能响醫院食慣左奶咀
所以唔識埋身啜, 我唯有pump出黍
但頭果10日都未上到奶, 一日只可以餵到1餐90ml人奶
依家先開始有多少少, 一日pump到2餐半,希望可以好快餵全人奶啦...

張小B來臨一刻

3月17日朝起身覺得個人好唔舒服, 但又唔知係咩唔舒服
可能係就到3月18預產期, 但又冇動靜, 所以好緊張, 幾晚都訓唔好
小B爸落街買左野俾我食, 但我食左一半就嘔哂
個心唔安落左幾日, 所以我叫小B爸同我去醫院check下.......

我訓左一個鐘, 3點幾就出發去醫院
去到我同姑娘講好似滲羊水, 因為我已經有幾日勁濕
姑娘初步檢查話冇穿, 醫生再用手檢查, 都話冇穿
但拎去化驗之後就話係羊水, 即刻好擔心唔知穿左幾耐
因為驚太耐會受感染, 加上我發燒, 所以醫生話同我落產房催生
燒到38度,所以要隔離, 响獨立病房聽住胎心機個幾鐘
醫生再檢查, 原來已經開左1度, 我都feel到少少陣痛
醫生話幫我打抗生素, 暫時唔落催生葯, 俾我試下自己開

落到產房, d姑娘快快手咁响我身邊整黍整去
之後有另一個醫生話幫我落催生葯,我即刻話唔係可以俾我自己試開咩
個醫生call返病房個醫生, 之後病房醫生話BIBI心跳快
驚我拖得太耐, 所以建議我開刀
我聽到即刻話好, 好擔心小B有事
之後就一輪風險講解, 叫我簽名, 我都冇聽

去到手術室就係麻醉, 响腰骨位打3針, 以為會好痛, 又接受到喎
之後用冰袋測試個下腹位確定已經feel唔到痛, 但都feel到有野掂我
跟住我就只係訓响度望住天花板, 其實都感覺到下面有人搞搞下
最後feel到醫生响我胃個位置推左幾下, 就聽到BIBI喊聲
兩行眼淚忍唔住流了~~

姑娘俾我望左一眼, 但我其實睇唔到佢個樣
只係確定佢係小B妹....

感恩, 張小B响我肚肚住足40週, 平平安安黍到依個世界!!!!

出世了

張小B於2011年3月17日出世....
重7.8磅!!

等...

產假已經放左一星期, 日日都去行兩個鐘, 小B爸仲去跑步

然後返屋企整下小B 既野, 再午睡個半鐘

好似過住退休既生活, 好寫意

但小B已經39W, 好想佢快D出世啦!!!

成日都留意住有冇動靜, 又好驚佢過期居留

真係開始有D精神緊張....

張小B, 你幾時先捨得出黍呀, 爸爸媽媽都好心急想見到你呀 !!!

健康院產前檢査(七)

38W3D, 健康院檢查

體重增加, 血壓, 胎心正常, 小B頭仔向下, 但仲响盤骨外面

我問姑娘有咩辦法可以令小B快D出世, 姑娘叫我同小B傾下計, 講下數

俾個日期小B喎, 真係好好笑

所以我同小B爸要開始每日同小B講今日係幾月幾日, 叫佢邊日就要出世

希望小B會聽得明, 乖乖快D出世啦, 哈哈~~

嘩~~~已經146磅啦, 重左26磅

三圍由未懷孕既34, 26, 36 去到依家36.5, 39, 40啦 !!!

仲有小腿同大脾都唔講得笑, 重量級呀!!!

臨生之前再去剪頭髮, 生完之後都唔怕唔洗得頭, 就算洗都好方便

剪到超短呢, 塊面包包咁呀, 不過好爽!!

四週年結婚紀念日

結婚四週年紀念日, 我地去左食韓國菜

小B爸一向都唔鐘意依個國家既料理, 所以印象中, 我地冇試過兩個人去食

但前幾日我經過韓國燒烤店時, 聞到好香既燒烤味, 就話好耐冇食過

點知小B爸好有心咁响朋友介紹下帶左我去食, 真係諗到諗唔到

平時我地一定會去食日本野架, 但因為怕我唔食得太多, 所以今次唔會食

咁我就一心諗住會去食西餐, 點知估錯左, 反而有驚喜~

間野個侍應好細心呀, 佢上茶既時候, 竟然唔洗叫就俾杯熱水我, 真係第一次遇到

D野食都好好味, 連泡菜都俾我食清光, 個炆牛骨好入味, 又'林', 好想再食

小B爸仲要啤一啤~~~

食到好飽响尖沙咀行左一個鐘, 之後揸住架車漫無目的咁去到MEGABOX

跟住就上左去發記食左碗芝麻糊加湯圓, 玫瑰百合燉川貝, 好滿足~~



老公, I LOVE YOU~~~~

Special Day

2011年3月4日...好特別既一日

張小B已經38weeks, 好期待快d見到小B呀~~

小B爸响做左6年既公司LAST DAY, 黍緊會做湊囡爸(暫時性)~~

小B媽產假前LAST DAY, 明天開始同小B爸一齊放長假, 迎接小B來臨~~

小B爸同小B媽結婚四週年紀念~~

 

新生活即將展開, 希望一切都順順利利,

有個好開始 !!!