臍帶血捐贈

之前都有睇過有關儲存臍帶血既資料, 但最近睇到報導, 臍帶血可以醫治既疾病

唔多, 而且仲未得到保障, 所以唔再考慮, 因為價錢都相當貴...

後來知道可以捐贈臍帶血俾幾間政府醫院, 費用全免, 手續簡單, 最重要係可以

幫到人, 即刻上紅十字會網站揾資料, 然後填表登記...

http://www5.ha.org.hk/rcbts/template?series=10&article=39

我同小B爸每年最少都會捐血一次, 幫到人, 又影響唔到自己, 真係冇藉口同原

因唔去做, 所以我都幫小B出世時可以做第一件善事...

産前運動班@威院(上)

之前經姑娘轉介報左産前運動班, 一共要上兩堂160元~

11月26上第一堂, 但原來只係聽講解同睇slide show, 唔夠一個鐘就完成, 聽到我

勁眼訓, 佢講既野大部份我都已經一早知道, 加上有三本小冊子提供, 內容同佢講

既一模一樣, 所以自己睇都已經可以, 但既然報左就去上啦, 下堂可以做運動, 希望

會比今堂好啦~

夜晚同老公去左mega box jusco, 睇左chuchu母乳玻璃樽, 真係好貴, 同pigeon差

好遠, 但聽好多網上媽媽講都話chuchu好, 所以都諗住會用, 但會先買兩個細樽,

 因為頭半個月想埋身餵奶奶, 而且好驚小B到時唔岩用, 所以買住兩個試下先,

到時岩用先再買大樽...至於消毒機, 我同小B爸都覺得可以用原始方法-沸水烚,

所以唔諗住買啦, 慳得就慳....依家會睇定D野, 過多個月就會去護協一次過買~~

小B, 你要乖乖地, 媽媽買咩俾你, 就用咩, 唔好扭計豬, 等爸爸慳多D錢錢, 第時

可以同小B去旅行呀~~

小B用品

近兩星期都忙於整理小B用品清單, 真係好苦惱, 唔知應該要預備咩, 唔知邊隻牌

子好, 唔知要買幾多數量, 四周圍參考其他準媽媽既清單, 又問下身邊已經有小朋

友既媽媽意見, 但人人既意見都唔同, 真係越睇個頭越大....

一田, JUSCO, 永安都已經行左幾次, 仲未決定到邊款BB車好, 邊張BB床好, 我同

小B爸都唔想買到太貴, 因為始終好快唔用得著, 所以大前提都係價錢平而實用

穩陣, 其他唔知有冇需要既野, 會等小B出左世睇下要唔要用先再買...

我地唔會俾最好既小B, 唔想佢覺得咩都係理所當然, 要佢知道要得到越好既野,

就要付出越多....

下個月就會開始掃貨, 因為再遲D我可能冇心冇力再去慢慢行, 腰骨已經開始

容易攰嘞, 而且預産期又係過年後, 到時怕冇足夠時間去準備, 所以要開始買定

入院同小B一出世要用既物品....



買左對好靚既kitty手套, 但唔係俾小B妹架, 係送俾朋友個囡囡, 不過我都好鐘意!!

我的小孩

早幾個月前, 我同小B爸透過培幼會助養左一個非洲兒童, 後來收到介紹佢既

一封簡介信, 仲叫我地寫封信俾個小孩, 我心係好想同佢通信, 但一直諗唔到

第一封信寫咩好, 所以放低左幾個月, 終於抽左小小時間, 用筆寫左封好簡單,

只有幾行, 加少少低B圖既信....

 

自從中學畢業之後, 已經好少用紙同筆親手寫一封信, 但無論係10年前學生妹

定10年後既準媽媽, 將寫好左既一封信寄出後, 都會期待住對方既回信...

助養兒童係我好耐之前已經好想做既一件事, 每次响電視睇到落後地方既小朋

友生活有幾辛苦, 我一定忍唔住流眼淚, 每個人都冇得選擇出生响咩地方, 佢地

一出世就要捱窮, 捱苦, 真係好可憐, 見到佢地, 我感受到幸福同快樂唔係必然,

好希望小B將來都會明白到'知足常樂', 會珍惜擁有既一切~~

威院産前檢查 (二)

11月17..返威院做檢查, 今次由姑娘講返上次做結構照聲波既結果, 一切正常,

但姑娘補多句, 唔係100%....

今次個姑娘好好, 有問必答, 仲解釋得好清楚...

聽小B妹心跳時, 小B妹唔多合作, 碌黍碌去, 姑娘揾左一陣先揾到, 但未聽到幾

下, 小B妹又碌左去, 姑娘都叫佢做'臭豬', 好好笑~

我問姑娘小B既體重, 佢答我依家咁早知道都冇用, 知道個SIZE同周數刎合就

已經足夠, 到預産期前先計BB重量都唔遲...

我又問姑娘我既體重, 四星期重左3.7KG, 姑娘話唔洗重咁多wo, 係唔係我食得

太多呢, 但我只係食早,午,下午茶同晚餐, 除左早餐豐富左, 其他既份量都係

一般, 咁要唔要食番少D呀, 好驚之後做檢查, 姑娘話我重得太多><

下次覆診可以去返健康院, 唔洗小B爸再一早車我出去lu, 希望健康院冇咁多

人, 唔洗等好耐啦, 响醫院真係冇3個鐘都唔走得....

小B妹?!

去威院照結構當日, 因為遇到個趕食飯既醫生, 令我心有不安, 為左唔好令自己

情緒低落, 所以即日打去Dr.Wong度book時間做檢查, 而且好好彩俾我book到....

終於見到小B啦, Dr.好清楚咁話我地知小B既頭仔, 眼仔, 咀仔, 冇兔唇呀,

仲有手仔, 腳仔, 照既時候, 小B仲揮手, 同一時間我就feel到個肚肚俾佢打左一下,

Dr.仲指出小B既'陰唇', 話有9成係女女呀, 原來係小B妹!!!

小B妹各方面都冇問題, Dr.最後依舊動聽既一句: BB長得好好!!!

開心哂~~小B爸睇完小B都好開心呀~~

羊水, 胎盤位置都好正常, 安心哂~~

22W,體重59KG,肚圍37吋,上圍36吋,下圍39吋

結構性超聲波檢查

11月8, 去威院做結構性檢查, 照下小B整體結構同心,肝仔等等既地方有冇出現

先天問題, 對小B黍講係大考, 所以小B爸都請假陪我一齊去....

一心以為可以見下小B, 點知個電視對住醫生, 我冇得睇, 而小B爸雖然睇到, 但

只係見到一舊舊雲, 根本唔知係小B既邊部份...

醫生全程30分鐘都冇講野, 加上一開始佢叫我地有問題照完先問, 所以我地都

冇出聲, 我照到真係想訓, 後來醫生話有某幾部份未照到, 要等小B轉身, 所以

我地出左去行個圈, 第二次照左15分鐘, 醫生依然冇講任何野, 最後只係話:

OK啦, 大致上冇咩問題.....正當我落床, 整理衫褲時, 醫生已經出左門口, 再講一

句: 你地走得啦....我同小B爸好無奈咁對望, 出到去, 已經冇哂人, 因為已經係食

LUNCH時間, 醫生應該都係趕食飯啦........

雖然聽到醫生講冇問題, 應該係好放心, 但難得醫院有一次照U/S, 我諗左幾個

問題準備問, 但一個都問唔到, 個心好唔安樂, 好似有野未完成咁....

無辦法啦, 唔洗錢, 唔要求得咁多, 只要小B健康, 就應該心滿意足.....

小B又有禮物, 都係小B姑姐送架!!!