回顧2010年

2010年話咁快就要過去, 回顧過去一年, 我只記得開心事,

唔開心的, 一件都記唔起...

2010年身邊多左4個新生命,

6月10日有契B豬出世, 榮升第二任契媽

6月16日比比妹出世

11月14日堂姪仔出世, 榮升堂姑媽

12月24日平安夜堂姪女出世, 榮升堂伯娘

祝幾位BB健健康康, 快高長大~~

而我自己既大事當然係肚肚入面多左小B啦~~~

2011年既願望係小B平安出世, 一齊順利,

一家人身體健康, 開開心心~~~

願所有人2011 年願望成真~~

新年快樂 !!!   HAPPY 2011 !!!

踏入30週

小B已經响我肚肚入面29w, 踏入30w, 即係話咁快就去到懷孕最後階段...

小B已經係我生活既一部份, 因為每日我都會感覺到佢, 由初時只係輕輕

踢一腳, 到依家大力'young', 有時仲會出現S型既郁動...由初時只係感覺到

肚肚入面'咕咕'聲, 到依家好似打樁咁'轟轟'聲..夜晚坐响sofa睇電視時, 偶然

望住自己個肚皮見到不停咁郁, 真係好好笑, 好似望住小B响度玩咁, 真係

好想知道佢响入面做咩...唔知小B會唔會係活潑既小朋友呢?!?

我個肚肚不知不覺大左好多啦, 感覺到自己個身體比以前重左好多, 出街行

一個鐘左右, 腰骨已經好攰, 尤其係食飽左, 個肚同個胃脹埋一舊既時候就

最辛苦, 就算响屋企坐低睇電視都唔可以坐得太耐, 腰骨會好唔舒服,

夜晚訓覺由唔知幾時開始已經唔可以一覺訓天光, 每次轉身都會醒...

唔知肥人同大肚腩既人會唔會有咁既感覺呢, 生完之後一定要好好修身,

有個大肚腩真係好輪盡架~~

病倒了

一直都唔敢亂食野, 怕會腸胃炎肚疴, 天氣一凍就著到成隻糉咁, 日日叫

自己最少食兩份水果, 飲勁多水, 早D訓, 半夜起身去尿尿要著返件褸, 返工

放工坐車戴口罩, 目的就係唔俾自己病, 加強自己抵抗力, 冇咁容易俾人傳染,

但最後都係敵唔過傷風菌, 終於病左....

但我知道身為一個媽媽要照顧自己小朋友, 首先要好好照顧自己, 所以我冇理

人地所講既有左BB唔好食葯, 第一時間就請病假去睇醫生, 因為絕對唔可以俾

病情惡化, 當然我有問清楚醫生D葯係唔係抗生素, 要唔要食哂, 對BB有冇

影响啦, 醫生回覆懷孕都可以食葯, 不過會開對BB影響最低既葯俾我, 但唔

可以話完全冇影响, 所以如果覺得病情已經好轉, 就可以唔再食, 因為紿終

食得越少先係對BB影響越低....所以最後D葯我只係食左兩次, 响屋企訓左兩日,

飲左好多水, 幸運地好快就好返....

病左果兩晚真係好辛苦, 個人明明好攰好眼訓, 但點訓都訓唔著, 搞到成個人

好忟, 忟到好想喊, 好彩有小B爸响身邊幫我按摩, 令我舒服D, 所以其實都辛

苦左小B爸, 我訓唔到, 成晚轉黍轉去, 佢都一樣訓唔好, 仲要第二朝起身返工....

我真係要再加倍小心, 唔好再俾自己病啦~~ 

小B, 媽媽對你唔住啦, 要你陪媽媽食葯, 但休息唔好只會影響小B長大, 所以

媽媽去睇醫生食葯快D好返, 先係對小B最好架...第時小B身體健康, 冇病冇痛

都係對媽媽最好架, 知唔知道?

準爸媽實習工作坊@bbcare(3)

12月18..上第三堂bbcare工作坊, 今堂由一位營養師講解食物對媽媽同BB

既好與壞, 仲有講解下BB會有既疾病, 同埋防疫針...

聽完佢講防疫針, 我就要考慮俾小B去健康院打定係去私家打啦,

因為健康院包既唔夠全面, 自己始終都要去私家補返幾針...

果幾針加埋都要幾千蚊, 依家私家有個package, 6千幾蚊可以打哂全部.....

小B爸就話join個package, 一來全面D, 二來佢可以唔洗請假都陪到小B

去打針, 而且有6合1, 小B可以打少幾針, 仲話可以減輕打針後唔舒服既反應,

但我就怕去私家打冇左政府既保障, 同埋就算唔去健康院打, 我都會定時同

小B去健康院CHECK-UP, 所以對我黍講就點都要請下假...仲未決定到呀~

2010聖誕節

聖誕節冇約人, 都冇特別慶祝節目, 只係同小B爸去左九龍灣行下街街,

影下相, 食下野, 不過周圍都好多人...

見到好多媽媽爸爸帶住BB去影相, 真係好期待出年同小B爸帶住小B

去睇聖誕燈飾, 影聖誕相呀~~

2010平安夜

今年平安夜, 公司依舊會一齊出去LUNCH, 但以往會去食BUFFET, 今年就揀左

去食上海菜, 對我黍講都好架, 因為BUFFET我有好多野都唔食得, 加上唔想行

出行入....

食完之後就返長沙灣, 但時間仲早, 所以去左sk契媽屋企, B豬近排真係唔鐘意

食奶奶, 一見到支奶就扭計, 見唔到就會同你笑, 望到佢咁都唔知好嬲定好笑...

之後同佢去左公園打千秋, sir滑梯...

B豬契女, 你真係好鬼可愛~~

玩完之後, 我就返媽媽度開聖誕party, 每年都會搞一次...

整下野食, 玩下啤牌, 一家人簡簡單單渡過, 好開心....仲搞左個抽獎,

每人贊助50蚊, 加埋之後再分幾個獎, 人人有份抽, 最後俾cc表妹抽到

大獎300大元, 佢勁開心, 跳哂舞, 而我就抽到二獎200大元, LUCKY~~~

最後玩啤牌玩到12點就返屋企, 今年我比往年冇咁活躍啦,

因為有左小B, 真係好攰, 留待出年同小B一齊玩得盡興D~



後記: 當日坐港鐵, 第一次有人讓座俾我呀....不過當日我又真係著得好肥,

個肚好顯眼, 好誇張既, 哈哈~~

劉德華演唱會

小B爸為我安排既特備節目係睇劉德華演唱會

華仔年代, 我並冇太瘋狂咁鐘意佢, 但到佢依家50歲人, 我竟然有興趣睇佢既

concert...話佢真係好靚仔,又唔係靚得咁緊要, 不過就有份味道, 可能我唔再係

妹妹仔, 會鐘意D比較成熟既男人...話佢唔老咩, 其實佢既眼袋已經好大, 跌左

落黍, 不過睇落又真係唔似50既, 最佩服係佢依然可以又唱又跳, 有氣有力開

十幾場...我最鐘意係佢既大方同一份幽默感....

可惜, 嘉賓係溫拿

但今次我係陀左小B去, 睇得唔夠興奮, 要控制住自己,唔可以大叫, 唔可以大

動作咁搖, 一路都好驚音樂太嘈影響到小B, 又驚突然既煙火巨响嚇親佢, 所以

用左頸巾, 褸, 同手袋遮住個肚, 再加埋我同小B爸既手按住, 希望將佢聽得到

既聲浪減到最細, 但小B成晚都有郁架, 尤其快歌, 有好嘈既鼓聲, 佢就會响

肚肚入面轉, 唔知係dancing定係表達不滿....

聖誕特備節目

上兩個星期小B爸响我地既calander記低左12月21日有聖誕特備節目

仲send個e-mail邀請我一同出席, 我睇到就問佢咩節目啦, 佢懶神秘咁話唔知

咁我冇再問啦, 因為都想有個surprise麻...但唔知點解前一日我突然有個感覺

心諗會唔會係........?

12月21日晚放工, 小B爸黍接我, 之後去尖沙咀, 仲話去食MC當當, 神秘節目

竟然去食D咁既野? 哈, 但我一D都唔覺得出奇喎, 仲要泊架車响尖東上火車站

果間MC當當, 仲要仲要好多人都堅持要食, 我估既已經中左9成....

我扮下野咁問點解今晚咁多人既, 係唔係有concert, 小B爸仲話邊個concert..

後來我去厠所, 佢用我個電話upload左張相上fb, 叫我睇下, 咁就開估lu,

而且證明我估既正確~~

哈哈, 係我太了解佢, 定係真係有第6感呢, 每次

佢想俾surprise我, 我都會事前就預料到...

不過就算冇左surprise, 我仍然感動, 因為一切都係佢為我而安排, 而佢為我所

做既都係我之前有同佢講過我想或者我鐘意既事, 証明佢有將我同佢講既野放

上心, 所以我真係真係好開心, 多謝老公~ 

健康院產前檢査(二)+母乳講座

12月20日..上午去大埔健康院CHECK-UP, 今次係第二次响健康院CHECK,

因為中間既時間都去左威院, 姑娘話冇咩特別事, 一直到生都係返健康院,

咁都幾好, 因為近屋企, 而且唔洗等好耐, 9點去到拎籌, 磅重, 量血壓, 聽BB心跳

摸下個肚肚SIZE, 見埋姑娘, 10點就搞掂走得....

27週, 體重: 63.5kg, 已經比未有BB前重左10kgs啦, 姑娘又係話重得快左, 叫我

要留意下, 但其實我唔係食好多野, 仲要一日兩餐都係屋企飯, 所以都唔知仲

可以點控制, 姑娘就話唔緊要, 可能有d媽媽特別吸收...

下午去左威院聽母乳講座, 聽個助產仕講得好簡單咁, 講到冇媽媽係餵唔到

自己既奶奶俾BB, 睇埋段真人示範片, 又真係好似好易咁, 只係頭一個星期

未上奶會辛苦D, BB要1至2個鐘就食一次, 所以媽媽會好攰, 但當上左奶, BB

習慣左, 食得多左, 就可以3-4個鐘食一次, 輕鬆好多..只要堅持到第一個星期,

唔好放棄, 唔好怕BB唔夠飽而俾左奶粉, 咁就會成功....

頭一個星期要靠小B爸幫小B掃風,沖涼, 換片片...而我只係負責餵奶, 仲要

多D休息...希望可以一直用我既奶奶餵大小B, 唔洗食奶粉啦.....

加油, 加油!!! 所有準備餵媽媽奶既準媽媽都要加油呀!!!

聖誕聚會

12月17約左小B既sk契媽一家, ky契媽一家同sammi契媽x'mas gathering, 本來

想去食buffet, 但太full啦, 所以最後去左太子酒店既Bubbles Bar食set dinner,

食物質素只係一般, 選擇又不多, 不過志在一齊高高興興食一餐...

因為有兩個BB, 所以進食速度比較慢, 有講有笑咁10點先離開餐廳

到外面睇燈飾影相, 但太夜啦, 小朋友們都要返家訓覺, 所以只係响海港城

影左一陣相就走, 而我因為都有個BB响肚肚入面, 所以好快就已經好攰...

小B爸, 小B媽, 仲有小B响媽媽肚肚入面影2010年聖誕合照~~

契BEE, 契B豬, 你地真係好可愛~~

3位好姊妹對我黍講真係家人一樣, 識左已經超過15年, 拍拖, 結婚,

生仔, 大家都會响對方身邊....開心, 悲傷, 難過, 都有佢地同我分享分擔,

每次見面總有一份難以形容既親切感覺, 能夠識到佢地, 係我既幸運,

係我既褔氣...



後記: 响人人茫海既尖沙咀竟然遇到BLOG友, 就係之前响產前運動班

相認, 將會一齊响威記生BB既準媽媽, 大家有緣睇到對方既BLOG, 再有緣

地响同一間醫院生, 又有緣地BB預產期差不多, 更意想不到响人多既尖沙咀

逗留了廿分鐘都可以遇上, 緣份真係奇妙!!

仲要, 睇返當晚朋友影既相, 見到有一張竟然影到佢同佢老公 ,

嘩哈哈, 好似拍戲咁呀!!!

準爸媽實習工作坊@bbcare(2)

第二堂bbcare工作坊講坐月護理,傷口護理,產後檢查,坐月飲食忌宜

之後既實習係教餵BB飲奶奶同埋幫BB掃風, 姑娘逐一幫每個準爸爸掃風,

俾佢地感受下唔同手勢既分別, 一係平掌, 二係曲掌, 姑娘兩個方法都好大力,

速度好快, 仲話同BB掃風都要有咁既力度同速度, 部份準爸爸都問會唔會打

親個BB呀, 但姑娘話一定唔會, 最後爸爸們都話曲掌比平掌舒服好多~

之後到各位爸爸幫公仔BB掃風, 小B爸又大力又快, 隔離個媽媽都話佢係

摩打手, 但姑娘竟然話佢做得岩, 小B會唔會俾小B爸打到內傷架, 不過如果

到時抱住果個係小B, 我諗佢未必會咁狠心...

就係依個公仔BB俾小B爸好大力咁掃風



小B, 你要乖乖地食奶奶, 又要乖乖地俾BABA MAMA掃風, 快快咁'ur'左d氣, 咁

BABA MAMA先有多D氣力同時間同小B玩架~~

與小肥肥合照

12月8同小B爸行街食飯, 路經荃灣廣場見到有小肥肥一族

即刻同佢地黍個合照

我同佢地同族啦..小肥肥一族~

小B响我肚肚入面一齊影~

只要响商場用電子貨幣消費就可以免費影POSTCARD~

小B爸個髮型正爆呀!!!

 

準爸媽實習工作坊@bbcare(1)

因為醫院既講座都安排响平日, 我同小B爸冇可能個個星期都請假去聽,

所以就報左bbcare既準爸媽實習工作坊, $1080一對爸媽, 有5堂, 每堂兩個鐘

12月4, 上左第一堂啦, 差唔多有廿對爸媽, 頭果個半鐘係講座

今堂講懷孕不適 , 入院準備, 作產先兆同分娩過程, 都講得好詳盡,

仲有notes, 姑娘都唔會講到好悶, 仲介紹走佬袋物品....

之後姑娘教點同BB換片片, 每對爸媽都有一個公仔BB同一條片片實習

姑娘講解完, 會逐個行去媽媽度睇一次個媽媽做得岩唔岩, 見到個個媽媽/爸爸

抱住個公仔BB換片片, 好好笑呀!  但小B爸唔知係唔係怕醜, 唔肯做一次,

仲話自己已經識, 到時小B出左世, 我睇佢有幾叻~

小腿抽筋

依個星期都訓得唔係幾好, 晚晚都發夢, 仲要係好無聊既夢...訓到半夜又會醒,

醒左又冇咁快訓得返, 搞到第二朝起身好似冇訓過咁, 返工勁攰~

有一晚終於都嘗試到抽筋啦, 印象中咁大個女第一次抽筋...訓到半夜想轉身,

小腿突然抽住好痛, 想放鬆都唔得, 即刻拍醒小B爸同佢講好痛, 佢唯有彈起身

幫我按腳, 按左兩三下就冇抽啦, 先可以再繼續訓, 但就好驚會再抽, 成晚都就

住黍訓, 第二朝起身隻小腿好似踩完一日單車咁瘀瘀痛, 要破下破下咁去刷牙

洗臉, 最後返到公司行多兩行先冇再痛....一直我都好怕會出現抽筋, 所以每晚

坐响sofa睇電視都伸直雙腳擰下, 臨訓前小B爸又會幫我按腳, 點知都係避唔過,

希望唔會有太多次啦, 抽筋真係會痛到叫救命....

為左唔想經常抽筋, 又唔想水腫, 所以好過份咁响公司set左個位俾自己可以

伸直對腳坐, 有時仲可以擰下對腳做運動, 哈哈, 連鞋都除埋, 真係好過份!!!

產前運動班@威院 (下)

12月1...再去威院上第二堂產前運動班, 今次可以响軟墊上面做運動, 但只係做左兩

個動作, 俾治療師睇我地做得正唔正確, 其餘動作都係個治療師示範, 睇住本書仔

照讀, 有一半動作仲話係產後先做得, 叫我地依家千萬唔可以做....其實到我生完,

我仲點會記得佢教過我點做wo....基本上兩堂既運動班加埋上左都冇兩個鐘, 如果

係免費, 我都覺得ok, 但咁就收左我160蚊, 有d揾笨.....

今次遇到個blog友仔啦, 第一次見面, 但一d都唔陌生, 因為大家有共同話題, 感覺

好好呀, 有機會要多d約見面做個朋友先得....

淘寶成功

一直都覺得網上購物好唔安全, 又冇保障, 俾左錢又驚收唔到貨, 收到貨又

驚d貨有問題...但最近見好多網上媽媽都話响'淘寶網'購到平貨, 而且質量

唔差, 所以我用左幾日時間流連响網上面研究付款方式同選貨, 最後買左兩件

孕婦衫, 經速遞兩日就收到貨, 冇穿冇爛, 跟網上圖片有9成似, 而且係收到

貨滿意先確認付款, 所以唔洗太擔心俾人呃, 當然事前要先了解整個過程啦~

相信我會再有下一次, 不過運費同付款手續費就貴左d, 下次揾朋友一齊買,

應該會低好多...

第一次網上購物 '淘寶' 成功!!!