小B已經响我肚肚入面29w, 踏入30w, 即係話咁快就去到懷孕最後階段...
小B已經係我生活既一部份, 因為每日我都會感覺到佢, 由初時只係輕輕
踢一腳, 到依家大力'young', 有時仲會出現S型既郁動...由初時只係感覺到
肚肚入面'咕咕'聲, 到依家好似打樁咁'轟轟'聲..夜晚坐响sofa睇電視時, 偶然
望住自己個肚皮見到不停咁郁, 真係好好笑, 好似望住小B响度玩咁, 真係
好想知道佢响入面做咩...唔知小B會唔會係活潑既小朋友呢?!?
我個肚肚不知不覺大左好多啦, 感覺到自己個身體比以前重左好多, 出街行
一個鐘左右, 腰骨已經好攰, 尤其係食飽左, 個肚同個胃脹埋一舊既時候就
最辛苦, 就算响屋企坐低睇電視都唔可以坐得太耐, 腰骨會好唔舒服,
夜晚訓覺由唔知幾時開始已經唔可以一覺訓天光, 每次轉身都會醒...
唔知肥人同大肚腩既人會唔會有咁既感覺呢, 生完之後一定要好好修身,
有個大肚腩真係好輪盡架~~
一直都唔敢亂食野, 怕會腸胃炎肚疴, 天氣一凍就著到成隻糉咁, 日日叫
自己最少食兩份水果, 飲勁多水, 早D訓, 半夜起身去尿尿要著返件褸, 返工
放工坐車戴口罩, 目的就係唔俾自己病, 加強自己抵抗力, 冇咁容易俾人傳染,
但最後都係敵唔過傷風菌, 終於病左....
但我知道身為一個媽媽要照顧自己小朋友, 首先要好好照顧自己, 所以我冇理
人地所講既有左BB唔好食葯, 第一時間就請病假去睇醫生, 因為絕對唔可以俾
病情惡化, 當然我有問清楚醫生D葯係唔係抗生素, 要唔要食哂, 對BB有冇
影响啦, 醫生回覆懷孕都可以食葯, 不過會開對BB影響最低既葯俾我, 但唔
可以話完全冇影响, 所以如果覺得病情已經好轉, 就可以唔再食, 因為紿終
食得越少先係對BB影響越低....所以最後D葯我只係食左兩次, 响屋企訓左兩日,
飲左好多水, 幸運地好快就好返....
病左果兩晚真係好辛苦, 個人明明好攰好眼訓, 但點訓都訓唔著, 搞到成個人
好忟, 忟到好想喊, 好彩有小B爸响身邊幫我按摩, 令我舒服D, 所以其實都辛
苦左小B爸, 我訓唔到, 成晚轉黍轉去, 佢都一樣訓唔好, 仲要第二朝起身返工....
我真係要再加倍小心, 唔好再俾自己病啦~~
小B, 媽媽對你唔住啦, 要你陪媽媽食葯, 但休息唔好只會影響小B長大, 所以
媽媽去睇醫生食葯快D好返, 先係對小B最好架...第時小B身體健康, 冇病冇痛
都係對媽媽最好架, 知唔知道?
12月20日..上午去大埔健康院CHECK-UP, 今次係第二次响健康院CHECK,
因為中間既時間都去左威院, 姑娘話冇咩特別事, 一直到生都係返健康院,
咁都幾好, 因為近屋企, 而且唔洗等好耐, 9點去到拎籌, 磅重, 量血壓, 聽BB心跳
摸下個肚肚SIZE, 見埋姑娘, 10點就搞掂走得....
27週, 體重: 63.5kg, 已經比未有BB前重左10kgs啦, 姑娘又係話重得快左, 叫我
要留意下, 但其實我唔係食好多野, 仲要一日兩餐都係屋企飯, 所以都唔知仲
可以點控制, 姑娘就話唔緊要, 可能有d媽媽特別吸收...
下午去左威院聽母乳講座, 聽個助產仕講得好簡單咁, 講到冇媽媽係餵唔到
自己既奶奶俾BB, 睇埋段真人示範片, 又真係好似好易咁, 只係頭一個星期
未上奶會辛苦D, BB要1至2個鐘就食一次, 所以媽媽會好攰, 但當上左奶, BB
習慣左, 食得多左, 就可以3-4個鐘食一次, 輕鬆好多..只要堅持到第一個星期,
唔好放棄, 唔好怕BB唔夠飽而俾左奶粉, 咁就會成功....
頭一個星期要靠小B爸幫小B掃風,沖涼, 換片片...而我只係負責餵奶, 仲要
多D休息...希望可以一直用我既奶奶餵大小B, 唔洗食奶粉啦.....
加油, 加油!!! 所有準備餵媽媽奶既準媽媽都要加油呀!!!
因為醫院既講座都安排响平日, 我同小B爸冇可能個個星期都請假去聽,
所以就報左bbcare既準爸媽實習工作坊, $1080一對爸媽, 有5堂, 每堂兩個鐘
12月4, 上左第一堂啦, 差唔多有廿對爸媽, 頭果個半鐘係講座
今堂講懷孕不適 , 入院準備, 作產先兆同分娩過程, 都講得好詳盡,
仲有notes, 姑娘都唔會講到好悶, 仲介紹走佬袋物品....
之後姑娘教點同BB換片片, 每對爸媽都有一個公仔BB同一條片片實習
姑娘講解完, 會逐個行去媽媽度睇一次個媽媽做得岩唔岩, 見到個個媽媽/爸爸
抱住個公仔BB換片片, 好好笑呀! 但小B爸唔知係唔係怕醜, 唔肯做一次,
仲話自己已經識, 到時小B出左世, 我睇佢有幾叻~
12月1...再去威院上第二堂產前運動班, 今次可以响軟墊上面做運動, 但只係做左兩
個動作, 俾治療師睇我地做得正唔正確, 其餘動作都係個治療師示範, 睇住本書仔
照讀, 有一半動作仲話係產後先做得, 叫我地依家千萬唔可以做....其實到我生完,
我仲點會記得佢教過我點做wo....基本上兩堂既運動班加埋上左都冇兩個鐘, 如果
係免費, 我都覺得ok, 但咁就收左我160蚊, 有d揾笨.....
今次遇到個blog友仔啦, 第一次見面, 但一d都唔陌生, 因為大家有共同話題, 感覺
好好呀, 有機會要多d約見面做個朋友先得....
之前經姑娘轉介報左産前運動班, 一共要上兩堂160元~
11月26上第一堂, 但原來只係聽講解同睇slide show, 唔夠一個鐘就完成, 聽到我
勁眼訓, 佢講既野大部份我都已經一早知道, 加上有三本小冊子提供, 內容同佢講
既一模一樣, 所以自己睇都已經可以, 但既然報左就去上啦, 下堂可以做運動, 希望
會比今堂好啦~
夜晚同老公去左mega box jusco, 睇左chuchu母乳玻璃樽, 真係好貴, 同pigeon差
好遠, 但聽好多網上媽媽講都話chuchu好, 所以都諗住會用, 但會先買兩個細樽,
因為頭半個月想埋身餵奶奶, 而且好驚小B到時唔岩用, 所以買住兩個試下先,
到時岩用先再買大樽...至於消毒機, 我同小B爸都覺得可以用原始方法-沸水烚,
所以唔諗住買啦, 慳得就慳....依家會睇定D野, 過多個月就會去護協一次過買~~
小B, 你要乖乖地, 媽媽買咩俾你, 就用咩, 唔好扭計豬, 等爸爸慳多D錢錢, 第時
可以同小B去旅行呀~~
早幾個月前, 我同小B爸透過培幼會助養左一個非洲兒童, 後來收到介紹佢既
一封簡介信, 仲叫我地寫封信俾個小孩, 我心係好想同佢通信, 但一直諗唔到
第一封信寫咩好, 所以放低左幾個月, 終於抽左小小時間, 用筆寫左封好簡單,
只有幾行, 加少少低B圖既信....
自從中學畢業之後, 已經好少用紙同筆親手寫一封信, 但無論係10年前學生妹
定10年後既準媽媽, 將寫好左既一封信寄出後, 都會期待住對方既回信...
助養兒童係我好耐之前已經好想做既一件事, 每次响電視睇到落後地方既小朋
友生活有幾辛苦, 我一定忍唔住流眼淚, 每個人都冇得選擇出生响咩地方, 佢地
一出世就要捱窮, 捱苦, 真係好可憐, 見到佢地, 我感受到幸福同快樂唔係必然,
好希望小B將來都會明白到'知足常樂', 會珍惜擁有既一切~~
11月17..返威院做檢查, 今次由姑娘講返上次做結構照聲波既結果, 一切正常,
但姑娘補多句, 唔係100%....
今次個姑娘好好, 有問必答, 仲解釋得好清楚...
聽小B妹心跳時, 小B妹唔多合作, 碌黍碌去, 姑娘揾左一陣先揾到, 但未聽到幾
下, 小B妹又碌左去, 姑娘都叫佢做'臭豬', 好好笑~
我問姑娘小B既體重, 佢答我依家咁早知道都冇用, 知道個SIZE同周數刎合就
已經足夠, 到預産期前先計BB重量都唔遲...
我又問姑娘我既體重, 四星期重左3.7KG, 姑娘話唔洗重咁多wo, 係唔係我食得
太多呢, 但我只係食早,午,下午茶同晚餐, 除左早餐豐富左, 其他既份量都係
一般, 咁要唔要食番少D呀, 好驚之後做檢查, 姑娘話我重得太多><
下次覆診可以去返健康院, 唔洗小B爸再一早車我出去lu, 希望健康院冇咁多
人, 唔洗等好耐啦, 响醫院真係冇3個鐘都唔走得....
11月8, 去威院做結構性檢查, 照下小B整體結構同心,肝仔等等既地方有冇出現
先天問題, 對小B黍講係大考, 所以小B爸都請假陪我一齊去....
一心以為可以見下小B, 點知個電視對住醫生, 我冇得睇, 而小B爸雖然睇到, 但
只係見到一舊舊雲, 根本唔知係小B既邊部份...
醫生全程30分鐘都冇講野, 加上一開始佢叫我地有問題照完先問, 所以我地都
冇出聲, 我照到真係想訓, 後來醫生話有某幾部份未照到, 要等小B轉身, 所以
我地出左去行個圈, 第二次照左15分鐘, 醫生依然冇講任何野, 最後只係話:
OK啦, 大致上冇咩問題.....正當我落床, 整理衫褲時, 醫生已經出左門口, 再講一
句: 你地走得啦....我同小B爸好無奈咁對望, 出到去, 已經冇哂人, 因為已經係食
LUNCH時間, 醫生應該都係趕食飯啦........
雖然聽到醫生講冇問題, 應該係好放心, 但難得醫院有一次照U/S, 我諗左幾個
問題準備問, 但一個都問唔到, 個心好唔安樂, 好似有野未完成咁....
無辦法啦, 唔洗錢, 唔要求得咁多, 只要小B健康, 就應該心滿意足.....
小B又有禮物, 都係小B姑姐送架!!!
10月20...去威院CHECK UP, 小B爸返工前車我去, 因為政府醫院既檢查都好簡單,
所以唔洗小B爸請假陪我..
等左個半鐘, 第一次見政府醫生, 都係聽下心跳, 今次小B既心跳比上次清楚, GOOD~
心跳聲都可以咁動聽, 緊係啦, 係我小B既心跳聲WO~
醫生問我有冇响私家約時間做結構檢查, 我呃佢話冇, 佢就幫我約响醫院做,
就咁慳左1600蚊啦, 為左小B第日有更好既生活, 唔講大話唔得, 真係唔好意思~
最後我問醫生我既情況, 佢話一切正常, 太好啦!!!, 最鐘意依句'一切正常'~
19W體重56KG, 比懷孕前重左3KG
個肚都明顯大左啦, 証明小B响我肚肚度一直長大~
今個中秋依舊選擇和家人一起度過
人越大, 越感受到人生中最重要, 最不能失去的就是家人
未來的數十年都期望可以和家人平平安安, 健健康康度過每一個節日
<中秋節一家人齊齊整整坐埋一齊, 嘻嘻哈哈, 有講有笑食餐飯, 人生最幸福的事>
今年肚入面多左小B同我一齊過中秋, 大家都已經感受到小B既存在,
小B仲好有口褔, 因為有原隻鮑魚食(雖然細細隻), 多謝小B爺爺咯~~
仲要多謝小B嫲嫲請我地去食紙上燒, 有燒牛肉, 燒帶子, 燒三文魚~~
緊加要多謝小B婆婆, 細姨婆, 三姨婆, 辛苦佢地煮左一餐豐富既中秋節飯~~
祝願所有人都可以一家人齊齊整整, 開開心心度過每一個中秋節!!!!
9月13日..一早9點就到威院做唐氏綜合症檢查, 登記完等左一個鐘先到我俾姑娘問
話, 再等多半個鐘先到我照, 主要係度下BB既頸皮厚度, 如果太厚就屬於高危....
照第一次: 姑娘話我膀胱好漲, 佢冇辦法郁到小B, 令小B轉位置, 所以要我去尿尿
先, 事實上我都有少少急, 因為已經坐左兩個幾鐘
照第二次: 小B不停拗住條頸, 將個頭向後屈, 姑娘話佢係度彎腰, 因為條頸唔係平
放, 所以都係照唔到, 搖左小B幾次, 個姿勢都係一樣, 姑娘叫我先去抽
血, 抽完先再返上去照, 咁我就落左去排隊抽血, 用左一個鐘...
照第三次: 小B一直貼住我, 姑娘話佢痴埋牆, 又係照唔到, 激死個姑娘, 最後又要再
等, LUNCH之後先再照
就係咁用左我一個上午都未成功, 走落CANTEEN食左個難食飯, 周圍行左陣, 見附
近冇人就細細聲同小B講野 ,叫佢合作D, 快快搞掂就返屋企, 到2點返上去再揾姑
娘,下午換左另一個姑娘, 比上午果個NICE D, 而且有耐性D (其實上午果個都幾好)
照第四次: 一開始姑娘就叫小B唔好蝦佢, 好好笑, 用左半個鐘終於度到個頸皮,
但原來仲要度個身長, 如果身長大過8.4cm, 就唔可以做依個測試, 要做
中期懷孕果個, 即係我成日既時間同抽左果支血都係白廢, 姑娘度左幾
次都過8.4, 最接近果次都要8.51, 不過姑娘好好, 冇放棄, 因為佢話只要
BB訓得好D, 唔好伸到個身直一直就勉強可以過關, 佢都好想我做到個
測試, 但因為仲有好多人等緊, 所以佢叫我等陣再照
照第五次: 咩都唔洗講, 一上床, 姑娘一照見到小B訓得好好, 即刻cap左張
相, 我同姑娘都好似求神咁, 希望過關, 睇住電腦顯示個長度, 好似
睇住自己比賽得幾多分咁, 結果8.38cm, 成功!
姑娘之後有再嘗試睇下小B會唔會再訓好D, cap多張比較下, 但
最後都係用返第一張, 姑娘仲話BB都幾錫MAMI, 姑娘話小B算係
中大碼B, 所以個身咁長, HAHA~~
由9點响醫院一直都5點先走, 好攰, 返到屋企即刻要上床訓一訓~~
幸運地最後都成功, 希望報告一切正常!!!
9月8日...第一次到健康院做產前檢查
9點3去到登記拎籌, 之後驗小便, 度高, 磅重, 量血壓, 一切正常
但體重依然冇增加, 明明覺得自己大隻左, 但多左出黍既地方點解冇重量既??
之後等左半個鐘見姑娘, 個姑娘好好, 不停問我身體狀況, 又會同我閒談下, 最後仲
問我有冇問題要問, 我話未諗到, 佢話係要D時間消化, 諗到再揾佢.....
見完姑娘就見醫生, 一入房就叫我上床做檢查, 唧左D啫喱响我肚上面, 之後揾支野
响上面碌黍碌去, 果下我個心真係擔心會唔會有咩事, 冇幾耐醫生就放一部好似收
音機既心跳機响我耳邊問我聽唔聽到BB既心跳, 我响'沙沙'聲中聽到一下一下, 急
速但有規律既'伏.伏.伏'聲, 我同醫生講好似風聲, 佢話初期係咁, 遲D就會聽得清楚
D, 好想叫醫生俾我聽多陣, 我覺得果一刻好似同小B溝通緊, 真係好親切, 真真正正
感受到自己身體入面已經有個小生命.....
好快就見完醫生, 聽埋講座, 11點9離開, 就咁都搞左兩個半鐘...
做完檢查知道小B健康, 心情特別好, 返到公司就算幾多野做, 幾煩, 都可以平心靜
氣慢慢做, 小B反而提高左我既EQ, 哈哈~
張小B,
MAMA每次做完檢查知道你健康, 心情都特別好, MAMA會一直保持好心情, 令你做個快樂B, 唔俾懷心情影響你, 你都要繼續健康長大, 唔好令MAMA擔心啊~~~大家一齊加油, 加 油!!!
已經三個月啦!!!!
終於明白點解個個媽媽都好期待頭三個月既過去...
因為怕小氣, 因為BB未穩定, 所以頭三個月都唔會向朋友報喜, 依種心情真係好矛盾
開心事當然係想向全世界宣佈, 同身邊朋友分享, 但要守住一個值得一齊高興既秘
密, 真係好難受, 所以終於可以公開依個blog啦 (人人都講緊微博時, 我仲打緊blog,
OUT)
頭三個月害喜症狀嚴重, 冇胃口, 作嘔作悶, 頭暈, 三個月後先會好轉, 甚至消失,
媽媽們就係等依一日, 幸運地我唔算好辛苦, 不過都期待症狀消失的一日, 因為見
到自己一向好鐘意既食物都冇胃口食, 好可憐, 希望從今開始胃口返番黍, 等我可以
食多D, 食大小B
最重要既係三個月後BB就進入穩定期, 做媽媽既緊係想BB响自己肚入面平平安安,
健健康康啦, 進入左穩定期, 擔心自然少左, 心情都會開朗左, 不過仍然要萬事小心
進入我的人生第一次懷孕第二階段, 好期待聽到小B既心跳, 好想快D感受到佢
依家開始多D同佢講野, 等佢認住我把聲先
小B爸話小B晚晚都游住水咁游上黍要佢錫
人人都話懷孕最難過就係頭三個月,等我回顧一下係唔係難過先.....
飲食 - 所有食得既我唔想食, 尤其係飯, 見到就想嘔
所有唔食得既, 超想食, SUSHI,魚生, 雪糕..通通被打入冷宫
(身邊有個嚴厲監護人, 想偷雞 ? 冇可能 !)
凍飲, 汽水,好似响我世界消失左..
我都覺得自己好勁, 咁熱既天氣仲可以飲熱野
胃口- 幸運地尚算OK, 食得落, 不過係响唔想食既情況下要自己食, 真係試過一路食
一路作嘔, 唔食又唔得, 每兩個鐘就肚餓, 一餓個胃就唔知想點, 所以一日可
以食7餐, 當然係少食多餐LA
精神 - 無時無刻都好眼訓, 成個人攰到坐又唔係, 訓又唔係, 有一個星期响公司
LUNCH後一定要眠一眠, 仲要訓到過哂鐘
晚晚未夠12點就要訓, FACEBOOK既GAME已經冇得再玩,
試過幾晚11點未夠就訓左, 晚晚最少要起一次身去尿尿, 試過一晚起3次
身體 - 唔算肥左好多, 個肚就脹左少少, 尤其食左野之後, 個胃同我肚變左一個波
肚臍附近多左好多毛毛, 仲未有妊娠線出現
第二次去做check-up比第一次(隔兩星期)輕左兩磅, 食左咁多野都冇重, 好有
可能俾小B搶哂, 咁就好啦
臉上多左好多粒粒, 尤其係額頭, 好想快D去做FACIAL, 我仲有好多格仔未用
總結, 過去三個月唔講得上食得好, 訓得好, 但幸運地食得落, 訓得著, 作嘔作悶唔算好嚴重, 不過都經歷過, 有人話害喜症狀唔一定只出現响頭三個月, 所以我唔敢講以上既症狀已經消失, 我唔奢望整個懷孕期都可以好舒服, 只希望食得, 訓得, 因為我唔食, 小B都要食, 我唔訓, 小B都要訓.....
繼續加油~加油! 加油!
8月23日晚, 相信是所有有良知的香港人悲痛的一晚, 但心有多痛都不及在事件中痛失家人的他們...當日我看到網上新聞有香港旅行團在馬尼拉被挾持, 我仍未意識到事態嚴重, 因為我一直認為香港人是幸福的, 不幸的遭遇很少會發生在我們香港人身上, 但原來不幸是無分種族, 無分你我, 晚上放工回到家看到電視畫面一句:[車上全部人質被殺], 我呆了, 不敢相信, 之後整個過程電視台直播, 我半步都沒有離開, 但一直看, 心一直跳, 每一次聽到有槍聲, 整個人都震了, 心不禁大叫:'唔好呀', 感受難以形容, 妄想過電視播的只是一套電影....最後槍手死了, 看到車上有活生生的人走出來, 我落淚了, 那一刻我仍以為所有人都會沒事, 一個一個走出來, 但最終有8個人離世.....
當晚我無法入睡, 就算入睡了也會驚醒, 醒了腦海就浮現電視上曾經直播的畫面, 真的很痛心, 無法想像當事人在車上的心情, 本來一家人懷著興奮的心情在假期出外旅遊, 彼此溝通, 增進感情, 但郤成為最後的旅程, 倖存者痛失家人, 一世留下令人又驚又悲的陰影,相信每個人每次出外旅遊前都會有著高漲的情緒, 計劃行程, 想想到那裡遊玩, 到那裡大吃大喝, 甚至買什麼手信給家人朋友, 怎會想到............
事件發生後, 所有市民除了悲痛, 還有怨恨, 批評菲律賓警方在拯救人質中種種的出錯, 甚至認為他們不是全心要救人, 但事情的真相重要嗎? 現在的一切交代可以彌補已做錯的事嗎? 我只覺得菲律賓這個國家沒辦法保護市民, 保護遊客, 我不會踏足這個無法給予我信心的國家..
這幾天我的情緒都被這件事影響了, 每一幕令人心痛的畫面都使我忍不住落淚, 我知道這樣很有可能會影響小B, 所以決定收拾心情,向受害者送上祝福後,壞心情就要離我而去,要小B是個開朗的人,自己必須要保持心境開朗,死者梁生可以為愛妻擋子彈,我不能不為愛B做這一點簡單的事.....
張小B,
MAMA近日的壞心情可能已經影響了你, 但當你長大後知道了這件事, 你必定會明白MAMA,亦會明白到香港人的那一份陌生但親切的關係.....
2010年8月17日 - KEN生今日生日呀, 往年我地會去大食日本野, 但因為今年有左小B, 我唔食得啦, 不過都離不開日本野, 去左甘味食烏冬, 而KEN生自己都食左兩隻大大隻既牡丹蝦, 之後响沙田行左一陣就返家, 因為有左小B之後, 我好易攰, 唔行得太耐, 又唔可以太夜訓, 出年等我同小B一齊再幫小B爸慶祝啦~~~
老公, 生日快樂~~~~
張小B,
今年我代你同BABA講左生日快樂, 出年你要自己送上Birthday Kiss啊!!!
2010年8月14日 - 兩星期過去了, 今日約左返去診所做檢査, KEN生放工後都陪我一齊去..檢查前都有擔心過小B健唔健康呢, 有冇大隻左呢, 一照之下就發覺佢大隻左好多啦, DR依舊果句, 長得好健康呀, 簡單既一句已經代表一切, 好聽既說話唔需要多, 所以好快就睇完, 食個LUNCH就回家午睡, 等小B都多點休息...
張小B,
MAMA聽到醫生叔叔講你一切健康, 真係比任何一句讚美我既說話動聽呀, 你要繼續長大啊!!!!
2010年8月13日 - 今晚KEN生同事為佢搞生日, 我做太太既當然有出席啦, 但地點係酒吧,所以我整晚只許睇同食,不許玩同飲, 雖然係咁, 我見到佢地玩得開心, 我都一齊開心, 但其實同事們係未知當場仲有小B架, 所以佢地叫我飲, 叫我玩, 我通通都SAY NO...因為主角係KEN生, 同事們當然唔放過佢, 唔飲得既佢, 好快就變得語無論次, 但言語間我聽到佢好多心底話, 並唔係對我講心底話, 係埋藏响佢心入面既一份喜悅
例証一: 無端端摸住我個肚講: 唔好叫我老婆飲呀, 佢唔飲得 (其實冇人叫我飲, 而且根本冇人聽到佢講咩)
例証二: 我同KEN生先行離開, 同事們都擔心地問我得唔得, 要唔要叫的士, 但KEN生講左句: 唔可以講住, 唔好提 (不過同事們都當佢語無倫次, 冇留心聽佢講野)
雖然佢飲到傻傻地, 但我好開心, 聽到佢講以上果兩句說話, 我由心笑左出黍, 因為由知道有左小B果刻開始, 大家都要低調, 將果份興奮有咁深收得咁深, 佢一直都冇表露過, 但今晚我感受到啦...
雖然KEN生飲到咁, 但佢仲好清醒咁顧住我同小B, 落樓梯既時候, 佢唔會拖住我, 叫我自己小心行, 因為佢驚自己失仲心拉埋我一齊碌落去, 回家途中, 佢仲不停咁同我say sorry, 因為佢應承我唔會飲醉, 但其實我冇嬲, 我見到佢玩得咁開心, 我都同佢一齊開心, 之後返到屋企, 我沖完涼出黍已經見到佢訓到豬咁, 幾擔心佢冇左呼吸, 即刻摸下佢仲有冇心跳, 真係俾佢嚇死......
張小B,
雖然BABA份人冇黍正經, 但佢好錫MAMA架, 我知道佢都會好錫小B你 !!
2010年7月21日 - 自從睇左中醫之後, M小姐都好少會遲到, 但今天已經係M小姐遲來的第十天, 朝早我已經準備好來個自我驗孕,但經過上次件事,我對結果沒有抱太大期望,即使出現了十字(BINGO了),都沒有太興奮,一直同自己講要到診所照到先可以確定一切, 因為實在係唔想自己再失望一次....之後因為怕會聽到醫生講時間太早未照到而日夜擔心, 影响到已經存在既小B, 所以決定遲兩個星期先見醫生
Mama和Baba在一年前已經準備好要迎接你的來臨, 但原來生小朋友不是我們可以掌握的, 即使一切已經準備就緒, 也要等待上天的安排...Mama曾經以為你已經來到我的肚子裏, 但你只是停留了一會就離開, 那一次令Mama真的很傷心, 平復過後, Mama跟Baba再次準備, 但到現在已經三個月, 其實時間不算很長, 但心急的Mama每天也期待著, 擔心這一輩子也沒有機會擁有你...很想問問上天要我怎樣才讓我早點得到你...眼見身邊朋友的小baby都出世了, 每當她們談到自己的baby時, Mama都會想想你將來會是怎麼的樣子...能夠成為一家人是需要緣份的,當緣份到來時, 就是你來到我肚子裏的時候, 張小B, Mama仍然期待著, 等待上天把你錫給我.....
